រដ្ឋាភិបាលជប៉ុន តាមរយៈកម្មវិធីអាហារូបករណ៍ធនាគារអភិវឌ្ឍន៍អាស៊ី-ជប៉ុន (The Asian Development Bank-Japan Scholarship Program) ប្រកាសផ្តល់អាហារូបករណ៍ថ្នាក់ក្រោយឧត្តមសិក្សាជាច្រើនកន្លែងដល់និស្សិតកម្ពុជា និងនិស្សិតក្នុងប្រទេសកំពុងអភិវឌ្ឍដទៃទៀត ក្នុងឆ្នាំសិក្សា ២០១៦ និង២០១៧។
ធនាគារអភិវឌ្ឍន៍អាស៊ី-ជប៉ុន (ADB-JSP) ផ្តល់អាហារូបករណ៍ថ្នាក់ក្រោយឧត្តមសិក្សាលើមុខ ជំនាញ រួមមាន សេដ្ឋកិច្ច (Economics) ការគ្រប់គ្រង (Management) សុខាភិបាល (Health) ការអប់រំ (Education) កសិកម្ម (Agriculture) បរិស្ថាន (Environment) ការគ្រប់គ្រងធនធាន ធម្មជាតិ (Natural resource management) វិទ្យាសាស្ត្រ និងបច្ចេកវិទ្យា (Science and Technology) និងមុខជំនាញពាក់ព័ន្ធនឹងការអភិវឌ្ឍមួយចំនួនទៀត។
បេក្ខជនជាប់អាហារូបករណ៍នឹងទទួលបានការធានារ៉ាប់រងថ្លៃសិក្សា ម្ហូបអាហារ កន្លែងស្នាក់នៅ ឯកសារសិក្សា ធានារ៉ាប់រងសុខភាព ថ្លៃធ្វើដំណើរ និងចំណាយផ្សេងសម្រាប់ ការស្រាវជ្រាវ អំឡុងពេលសិក្សា។
បេក្ខជនមានបំណងចូលរួមកម្មវិធីអាហារូបករណ៍ ត្រូវបំពេញលក្ខខណ្ឌមួយចំនួន ដូចជា និស្សិតកំពុងប្រទេសអភិវឌ្ឍ មានបំណងចង់បន្តការសិក្សាថ្នាក់អនុបណ្ឌិត និងបណ្ឌិត មានបរិញ្ញាបត្រ ឬសញ្ញាបត្រសមមូល បទពិសោធន៍ការងារជំនាញយ៉ាងតិច ២ឆ្នាំ សុខភាពល្អមាំមួន និងចេះ ភាសាអង់គ្លេសច្បាស់លាស់។ បេក្ខជនត្រូវត្រឡប់មកប្រទេសកំណើតវិញ បន្ទាប់ពីបញ្ចប់ការសិក្សាស្រាវជ្រាវដោយជោគជ័យ។
លោកអ្នកអាចដាក់ពាក្យ និងទទួលព័ត៌មានបន្ថែម តាមរយៈគេហទំព័រអាហារូបករណ៍ http://www.adb.org/site/careers/japan-scholarship-program/main ៕
